worst case scenario...

Kvöldstund með Hjálmum

2005-12-10T15:46:00.000Z

Lagði sjálfan mig í stórhættu og fór á Eskifjörð í gærkvöldi að sjá uppáhalds íslenska bandið mitt Hjálma. Er búinn að vera að bíða allt of lengi eftir því að sjá þá á tónleikum og loksins mættu þeir austur. Þvílíkir snillingar sem þetta eru, enda ekki við öðru að búast með Steina fremstann í flokki. Furðulegt að þeir skulu ekki vera löngu búinir að halda tónleika hérna fyrir austan því drengurinn er uppalinn á Hallormsstað og það var einmitt þar sem að Steini byrjaði að spila á gítar og þá var sko ekkert verið að dútla neitt við hlutina. Að sögn kunnugra svaf drengurinn við hliðina á gítarnum og lagði hann varla frá sér þegar hann var vakandi. Það tók hann líka ekki langan tíma að ná tökum á þessu og strax 15.ára var farið að tala um hann sem einn mesta gítarsnilling á íslandi. Steini hefur ekki aldeilis staðið í stað í tónlistinni síðan ég hitti hann síðast en þá vorum við nýkomnir frá Amsterdam á bílaleigubíl ásamt Einsa græna og Pétri Maack, hvar við höðum dvalið í nokkra daga og var förinni heitið á Hróarskeldu. Steini hafði farið eitthvað óvarlega í fjármálunum í upphafi ferðalagsins og var orðinn gjörsamlega blankur. Hann brá því á það ráð að selja Einsa græna, miðann sinn á hátíðina þar sem Einsa sárvantaði miða eftir að hafa verið rændur grimmilega af glæpagengi í Amsterdam. Steini gaf sem sagt hátíðina upp á bátinn og sagði skilið við okkur og hélt yfir til Svíþjóðar þar sem hann hafði fengið inni í tónlistarskóla. Þetta var árið 1996. Nú er Steini kominn heim aftur eins og allir vita, með 3 svíja í handfarangrinum og afraksturinn er eitt magnaðasta band íslenskrar tónlistarsögu. Ég var ekki svikinn af þessum tónleikum og flest lögin hljóma mun betur á tónleikum heldur en af plötunum. Það er líka eitt sem Hjálmar hafa umfram önnur bönd. Skilyrðislaus spilagleði sem ég hef ekki séð hjá neinni annari hljómsveit á landinu. Það voru ekki margir í Vallhöll á Eskifirði, kanski svona 200 hræður. 6 manna hljómsveit flær ekki feitann gölt á svoleiðis kvöldi þegar búið er að draga frá ferðakostnað og ýmislegt annað tilfallandi. En þeim var skít sama og höfðu augljóslega allir mjög gaman af því sem þeir voru að gera. Ég er ekki viss um að þeir í Sálinni hefðu séð ástæðu til að borsa eða vera hressir fyrir svona fáa áhorfendur. En þetta voru sem betur fer Hjálmar en ekki Sálin.

Ég lifi...

2005-12-08T15:30:00.000Z

Bara svona rétt að láta vita að ég komst að sjálfsögðu lifandi úr margfrægum Bretlandstúr okkar félaganna. Mér hefur aftur á móti reynst ansi erfitt að koma ferðasögunni niður á blað sökum andleysis og það er ljóst að ég er enginn Gilzenigger sem skrifar eitt stk bók á 3 vikum. Það hlýtur bara að vera rosalega vel skrifuð bók. Örugglega nýr Laxnes þar á ferðinni. Annars er maður hálf fúll í dag. United skitu á sig í meistaradeildinni í gærkvöldi, rétt eins ég var næstum búinn að gera þegar ég læsti mig úti er ég dvaldi hjá Björgvin á Vaughan road í London um daginn, en nánar um það síðar. Er að skrifa ferðasöguna og birti hana hér innan tíðar í nokkrum hlutum.

ég fer í fríið...

2005-11-02T17:34:00.000Z

Jæja, þá er langþráð stund upp runnin. Ég er kominn í frí og var tími til kominn, því ég er búinn að þræla eins og síberískur sleðahunudur frá því um miðjan september til að safna gjeld eins og Adolf gamli Hitler sagði. 60 fjölskyldur sitja því á rassgatinu og horfa á sjónvarp yfir adsl því ég er búinn að hjálpa þeim að láta það gerast í mínum eigin frítíma, því auðvitað hef ég sinnt minni hefðbundnu vinnu á venjulegum vinnutíma. En það má ekki gleymast að þessar 60 fjölskyldur eru líka að hjálpa mér að láta það gerast svo að þetta er gagnkvæmur gróði. Fór í slökun áðan hjá mömmu hanns Benna því að ég var orðinn slæmur í skrokknum af öllum þrældómnum og hún staðfesti það sem mig hafði grunað; Það er búið að binda hnút á hryggsúluna í mér. En hvað með það, Ich habe geld eða gjeld, hvernig sem þetta var nú allt saman, Magnús minn Gehringer. Ég fer í fríið eins og Þorgeir Ástvalds, og takk sömuleiðis Sigurrós, ég sé ykkur eftir viku.

Loftslagsbreytingar í Baisingstoke, uppfært

2005-10-21T14:47:00.000Z

Nú er farið að styttast all verulega í opinbera heimsókn til bretlandseyja og spenningurinn er orðinn yfirþyrmandi. Örlitlar breytingar til hins betra hafa orðið á dagskránni en það veldur að vísu vonbrigðum að það er búiða að aflýsa fyrirhugaðri ráðstefnu um loftslagsbreytingar sem halda átti í Baisingstoke. Uppfærð dagskrá lítur annars svona út;

3. nóv; Flogið út
4. nóv; Lestarferð til Wolverhampton og tónleikar með Turin Brakes um kvöldið
5. nóv; Wolves vs Norwich á Molineux í Wolverhampton. Lestarferð til Manchester eftir leik
6. nóv; kl 16:00 Man Utd vs Chelsea, kl 19:30 Deus í Manchester University
7. nóv; Deus í Shepards Bush Empire, London.
8. nóv; White Stripes í Alexandra Palace, London.
9. nóv; Hér bind ég vonir við að Dóri Pella bjóði mér á tónleika með Sigrurrós sem eru um kvöldið. Annars neyðist ég til að brenna miðan sem ég kepti fyrir hann á White Stripes.
10. nóv; Skoðunarferð í teverksmiðju Earl Gray
11. nóv; Ekkert planað, afslöppun
12. nóv; flogið heim.

Klukk hvað ?

2005-10-10T08:42:00.000Z

Það tók mig ekki nema rétt rúma 12 sólarhringa að átta mig á því hvað Gummó var að meina með þessu klukk dæmi. (Ekki það að ég er alveg búinn að sofa og éta og mæta í vinnuna og svona á meðan, ekki misskylja, ég er ekkert búinn að sitja bara og hugsa um þetta) En það er samt oft svona með hluti sem dúllarinn segir, þeir fara inn um annað og út um hitt ;-) En hér koma ómissandi staðreyndir úr lífi mínu.

#1. Ég var rétt búinn að missa hægra augað þegar ég var lítill að leika mér skíðastaf í klofinu út í fjárhúsum, (ekki reyna að misskylja þetta, skíðastafurinn var sko hestur.) Hesturinn fældist og endastakkst, annar endinn í taðið og hinn í augað, og glóðaraugað var glæsilegt. Nú notast ég bara við alvöru hesta því að það eru minni líkur á að fá þá í augað.
#2. Ég og Eiríkur fermingarbróðir vorum ekki þægilegir á bernskuárunum. Brutum meðal annars allar rúðurnar í Gamla bænum og mygum í djúsbrúsa Hjartar, pabba Eiríks, sem kallinn síðan svolgraði úr, lafmóður og sveittur á heitum sumardegi í heyskapnum.
#3. Ég var einusinni að vinna við allskonar stúss í Reykjavík hjá Kidda í Hljómalind. Vinnufélagar mínir voru ekki af verri endanum. Sveinbjörn Kristjánsson, fyrrverandi Símabókhaldssnillingur, sá um bókhaldið og fjármálin og Jóhannes B. Skúlason, aðaleigandi Skulason ltd fékk alltaf góðar hugmydnir.
#4. Ég skoraði fyrsta, og lengi vel leit út fyrir að það yrði eina, mark Hugins Fellum, á gullaldar ári þeirra í 4.deild. Ég held að markatalan hafi verið 3 eða 4- 170 og eitthvað þegar upp var staðið. Ef það er ekki met enn þann dag í dag þá hlýtur það að vera mjög nálægt því.
#5. Ég braut á mér ristina þegar ég var að bera öldauðan félaga minn, hann Stefán Erlendsson, heim af djamminu. Ætlaði að stytta mér leið út úr blokkinni og í stað þess að nota stigann hoppaði ég fram af svölunum á annari hæð og hviss bang búmm eins og Dúllarakvikindið sagði....

Ég klukka Ástu og Helenu á leið heim frá Dyflinni, Olgeir og Arnar pé og Gúnda Jeltzýniski, og ég er viss um að þeir þrír síðastnefndu verða lengur en ég að taka við sér. Ding dong ! Úps, ég verð víst að fara til dyra. Breska efnahagsafbrotadeildin og skattrannsóknarstjóri bíða nú í röðum á svölunum hjá mér, og svei mér þá ef hann Hjörtur er ekki kominn með reikninginn fyrir rúðunum.

Harmsaga úr samtímanum

2005-10-06T17:28:00.000Z

Það bar til tíðinda í gær þegar ég var að taka upp úr innkaupa poka mínum úr bónus, að er ég stakk hendinni ofan í pokann til að grípa feta ost sem þar var í plastumbúðum, kenndi ég samstundis til vætu í lófanum eftir að hafa handleikið pakkninguna góðu með feta ostinum. Taldi ég að orsök vætunnar hlyti að liggja í því að pakkningin hefði lekið og stakk fingri í munn til að fullvissa mig að sá grunur minn reyndist réttur. En varð mér þá um og ó og fann til skindilegrar velgju, og litlu mátti muna að ég hreinlega kastaði upp. Komst ég þá að því að það var ekki feta osturinn sem var sökudólgurinn í þessu máli, heldur sápubrúsi sem greinilega hafði örvast við flutninginn og sprautað hvítum vökva yfir ferðafélaga sína í pokanum, sem eðlilega voru allir í uppnámi.

Tregablandinn söknuður

2005-09-27T00:05:00.000Z

Horfði nú fyrir skömmu á eftir vini mínum og ferðafélaga hverfa út í óvissuna í hinsta sinn. Það fór um mig undarlegur hrollur og ég fann að það var stutt í tárin. Margar ljúfar minningar um þennan trygga vin ylja nú sálartetrinu á köldum haustdögum. Ég man eins og gerst hefði í gær er við hittumst fyrst fyrir rúmum tveim árum síðan, og tókust strax miklir kærleikar með okkur félögunum. Ég hafði lengi haft augastað á þér og hafði dáðst að glæsleika þínum úr fjarska. Samvistir okkar voru áfallalausar að mestu og samstarfið með eindæmum gott. Hápunkturinn á okkar ferðalögum var tvímælalaust í fyrrasumar þegar við lögðum á okkur langt og strangt ferðalag um landið þvert og endilangt. Byrjuðum á að fara suður, síðan vestur með Breiðafjarðarferjunni Baldri, þá norður, inn á miðhálendið og loks siluðumst við hægt og örugglega austur. Ég man hvað þú varst þyrstur í þessari ferð, og þurfti ég að passa upp á að þú fengir nóg að drekka og hafa varabyrgðir meðferðis svo að þú þornaðir ekki upp og kæmist örugglega heim. Vinnusemi þín var með eindæmum og skilaðir þú okkur ávallt á leiðarenda. Skipti þá engu máli hvort að þú þurftir að draga þunga hestakerru eða bera mikið hlass langa vegalengd. Aldrei varst þú með vol eða væl, ef einungis var passað upp á að þú hefðir nóg að drekka. Nú ert þú horfinn á vit nýrra ævintýra og munt nú þjóna örum húsbónda. Það verður erfitt að finna staðgengil þinn og efa ég það stórlega að ég eigi í nokkurn tíma eftir að gera jafn góð kaup í bílaviðskiptum. Gamli rauður, ég kveð þig með söknuði og megir þú njóta ellinnar með fullri reisn. Þú ert fallegur yst sem innst.

Birrlibarrlibí

2005-09-26T12:11:00.000Z

Birrlibarrlibí,
afmæli birrlibarrlibí,
afmæli birrlibarrlibí,
ég á afmæli sjálfur,

Birrlibarrlibí,
afmæli birrlibarrlibí,
afmæli birrlibarrlibí,
ég á afmæli í dag.

Loftslagsbreytingar í Basingstoke

2005-09-18T16:26:00.000Z

Var að ná í miða á White Stripes á e-bay fyrir mig og Gúnda þannig að það bætist stöðugt við dagskrána í reisunni. Hún er þá einhvernvegin á þessa leið:
3. nóv; flogið út
4. nóv; Ráðstefna um loftslagsbreytingar í Basingstoke
5. nóv; Tónleikar með Hiphoptimzt, (Oddur og co) í Bristol
6. nóv; kl 16:00 Man Utd vs Chelsea, kl 19:30 Deus í Manchester University
7. nóv; Deus í Shepards Bush Empire, London.
8. nóv; White Stripes í Alexandra Palace, London.
9. nóv; Fundur fótaaðgerðasérfræðinga í Huddersfield.
10. nóv; Skoðunarferð í teverksmiðju Earl Gray
11. nóv; Ekkert planað, afslöppun
12. nóv; flogið heim.
Eins og sjá má er þetta stíft prógram og þarf að halda vel á spöðunum ef allt á að ganga upp. Pocket Revolution hjómar betur en ég þorði að vona og ekki hægt að segja að ég hafi orðið fyrir vonbrigðum með kallana. Annars er ég með blöðrur á höndunum eftir að hafa rakað grjóti í gær í tvo tíma. Ótrúlega skemmtileg iðja og ég skil ekkert hvað ég hef verið að pæla að hafa ekki gert meira af því að raka grjóti upp á síðkastið. Fjölmargir lesendur þessarar síðu hafa eflaust tekið eftir því að hann Mark vinur minn var svo indæll að lauma link inn á nytsamlega síðu fyrir einhleypa, um leið og hann commentaði á það hvað honum þætti síðan mín cool. Takk Mark, þú ert frábær náungi.

Stórframkvæmdir

2005-09-08T13:20:00.000Z

Hef staðið í stórræðum við endurskipulagningu á heimilinu. Meðlegjandi minn af rússnesku bergi brotinn flutti út og inn kom fljótsdælingur að nafni Benedikt Logi Hjartarson Kjerúlf. (langt nafn fyrir stuttan mann) Til stóð að Benni flytti inn um miðjan mánuðinn, og ætlaði ég í örlæti mínu að láta honum í té stærra herbergið í íbúðinni. Aðallega vegna þess að Benna fylgir mini Benni, Hjörtur nokkur junior Kjerúlf og til samans eru þeir stærri en ég og því við hæfi að þeir hefðu meira olnbogarými en ég. Það kom hins vegar upp einhver misskilningur um hvenær Benni skyldi yfirgefa þá íbúð sem hann var í ásamt öðrum og síðastliðið þriðjudagskvöld í síðustu viku, um 9 leitið, hringir drengurinn og segist vera á leiðinni með flutningabíl fullan af dóti og hafi í hyggju að flytja inn þá um kvöldið. Nú voru góð ráð dýr, og í tryllingi byrja ég að flytja allt mitt drasl á milli herbergja. Í örvæntingarfullri tilraun við að koma rúm garminum fyrir þversum í litla herberginu sagaði ég c.a, fimm cm af rúminu en án árangurs. Rúmið komst bara fyrir langsum sem hefur gífurleg áhrif á heildar strúktúrinn í herberginu. Ég rétt get smegt mér inn um dyrnar, látið mig falla í rúmið og lokað augunum. Allt gólfpláss er fyrir bý, sem er reyndar bara jákvætt, því að í stóra herberginu var þar aðallega að finna föt á víð og dreif, sem er nú ómögulegt. Það er alls ekki pláss fyrir fataskáp í þessu herbergi og því réðist ég í það að endurhanna geymsluna sem fataskáp og fékk til þess iðnaðarmann af neðri hæðinni, enda veitir ekki af þegar parkettleggja skal einn og hálfan fermetra. Ég er nefnilega ekki einn af þeim sem lét gabba mig með þessum fólskulegu Húsasmiðju auglýsingum þar sem er fullyrt að allt sé leikur einn og lítið mál. Þessar auglýsingar eru eitt mesta svindl íslandssögunnar og hafa örugglega komið mörgum klaufanum í stórkostleg vandræði. Annars er ég bara hress, bara 4 dagar þangað til að nýja dEUS platan, Pocket Revolution kemur út og Olli er búinn að lofa mér miðnætur opnun í BT svo að ég þurfi ekki að kveljast lengi. Svo hefur bæst einn ferðafélagi við fyrirhugaða reisu á Old Trafford og dEUS tónleika. Arnar Pétursson hefur nefnilega ákveðið að veita okkur Gúnda þá ánægju að slást í för með okkur. Magnaður andskódi.

Bændablaðið Freyr

2005-08-28T10:23:00.000Z

Sumarið er greinilega komið, og farið á mettíma þetta árið. Farið að grána í fjöll og þetta minnir mann helst á einhverja eiturþoku úr lélegri hryllingsmynd, sem læðist að grunlausu fólki, sem nú djöflast við að hlaða innkaupakörfurnar í Bónus og byrgja sig upp fyrir veturinn, eins og íkornar. Það er víst ekkert annað sem liggur fyrir manni en að fara að endurraða í fataskápnum, þannig að innan seilingar verði flíspeysur og prjónabrækur, en það verður eðlilega djúpt á hlýrabolum og lendarskýlum. Annars hef ég sökum kólnandi veðurs, haft meiri tíma til að vera á netinu, og í gær sló ég að gamni upp nafninu Gísli, eða Gisli á leitarvél, og fékk fleiri þúsund niðurstöður. Það kom í ljós að í Noregi býr maður að nafni Gísli sem er tónlistamaður af íslensku bergi brotinn. Ég hef ekki hlustað á kvikindið en ég er að undirbúa það núna. Svo var ég að taka til í geymslunni í gær og rakst á allskonar fornsögulega muni. Til dæmis var þarna hellingur af lesmáli, eins og Bændablaðið Freyr frá 6. og 7. áratugnum, þannig að ef ykkur vantar eitthvað að lesa þá hafið þið bara samband.

Miðarnir komnir í hús, og golfsettið líka

2005-08-25T23:23:00.000Z

Ég hef alveg gleymt að minnast á það hérna að ég held hvorki vatni né vindum af spenningi þessa dagana. Ég og Gúndi erum nefnilega á leiðinni á tónleika með dEUS, 6. og 7. nóvember og miðarnir eru komnir í hús. dEUS hringir sjálfsagt ekki bjöllum í hausnum á almúganum, en þeir sem eru með svarta beltið í tónlist vita hvað ég er að tala um. Fyrri tónleikarnir eru í Manchester þann 6.nóv og svo skemmtilega vill til að Manchester United spilar við bling bling (Chelsea) sama dag og ég er kominn með miða á leikinn. Seinni tónleikarnir eru svo í London kvöldið eftir. Eins gott að grípa tækifærið og fara á tvenna tónleika með þessum snillingum því maður er búinn að vara á leiðinni að sjá þá í 15 ár og ekki er verra að sjá Mansarana rústa Chelsea í leiðinni. Ég og Gúndi höfum áður gert góða túra saman á erlendri grund. Roskilde 2001 var öflug reisa og fyrir tvemur árum fórum við að sjá Radiohead í London og skruppum í leiðinni til Manchester að sjá Muse. Gúndi kom mjög sterkur inn í þá ferð, ný kominn í land af línuveiðum og skartaði ógurlegu mústasi. Hann minnti óneitanlega á Rússneskan vélvirkja sem hafði verið innilokaður um borð í kafbáti í mörg ár. Það verður spennandi að sjá hvaða þema verður í gangi hjá honum þetta árið. Ég stóð við stóru orðin í síðustu viku og skellti mér á spá nýtt golfsett. Rándýrt helvíti, heilar 12.999.- í Bónus. Það þýðir sko ekki að vera með nein sparnaðar sett þegar efnilegustu golfarar landsins eru annarsvegar.

Hundraðþúsundkjell

2005-08-18T08:38:00.000Z

Ég sá afar áhugaverða umræðu í morgunsjónvarpinu í síðustu viku, þar sem Pétur Blöndal kom og skilaði heimaverkefni sem fólst í því að hann átti að útskýra hvernig hægt væri að lifa af hundraðþúsund krónum á mánuði, en hann hafði einmitt látið það út úr sér að það væri nú vel hægt. Pétur hóf lesturinn og tók það fram að hann ætlaði í fyrsta lagi alls ekki að eiga börn því að það væri rán dýr andskoti sem bæri að forðast í lengstu lög. Svo ætlaði hann að eyða 25 - 35 þús í húsaleigu og vera ofsalega sniðugur og leigja með 2-3 öðrum (einmitt Pétur, hver heldurðu að vilji búa með þér) sem væru í svipaðri stöðu eða bara leigja sér lítið herbergi. Hann ætlaði alls ekki að vera með sjónvarp og alls ekki blöð, en hann ætlaði að vera með nettengingu sem kostaði um 5000 kall (Hann tók ekki fram hvar hann ætlaði að stela tölvunni, en ég geri ráð fyrir því að hann geri það því hún var ekki inn í fjárhagsáætluninni) 4000 krónum ætlaði hann að eyða í föt, líklega í kolaportinu. Svo ætlaði hann að éta einhvern óþverra sem kostaði ekki neitt, sennilega hafragraut í öll mál, og alls ekki landbúnaðarvörur því þær væru allt of dýrar. Í matinn áttu að fara um 20 þús. Svo ætlaði kallinn að fá sér strætókort og alls konar munað sem á endanum tók neysluna upp í 95 þúsund á mánuði með nýmóðins hlaupaskóm sem kallinn getur ekki verið án því að hann hleypur víst 30 km á dag. Það sjá allir sem vilja að maðurinn á eftir að lifa í vellistingum með þessa peninga á milli handanna og þar að auki sleppur hann við alla ábyrgð sem fylgir því að ala upp börn og taka of mikið þátt í lífinu almennt. Þarna hefur hann 5000 kr á mánuði í afgang til að eyða í hlutabréf og hann gæti jafnvel leyft sér að skreppa í bakpokaferð til útlanda einu sinni á ári ef hann kaupir ekki hlaupaskó nema annan hvern mánuð. En í raun segja þessir útreikningar Péturs okkur aðeins eitt. Alþingismenn eru allt of hátt launaðir. Ef það er jafn lítið mál að lifa af með hundraðþúsund kall á milli handanna og útreikningar Péturs gefa til kynna, væri rétt að allir alþingismenn mundu bara tékka sig inn á hjálpræðisherinn þar sem leigan er mjög ódýr miðað við það sem gengur og gerist. Þá gætu þeir sagt upp öllum einkabílstjórunum og labbað í vinnuna og sparað þannig stórfé fyrir hinn almenna skattborgara. Það sem sparaðist við þetta væri svo hægt að nota til að klára að malbika hringveginn og ýmislegt sem hefur setið á hakanum vegna þess að við erum búin að vera að eyða allt of miklum peningum í það að yfirborga alþingismenn þegar þeir gátu allan tíman komist af með miklu minna.

Happy Gilmore

2005-08-17T17:50:00.000Z

Á dauða mínum átti ég nú von. En ekki átti ég von á því að fara hring á hinum margfræga Ekkjufellsvelli í sumar. Ég hef aldrei farið meira en 3 holur á golfvelli áður í einni lotu og leið svo sem ekkert illa yfir því. Svo er mál með vexti að félagi minn hann Stefán er staddur í heimsókn hjá mér þessa vikuna ásamt syni sínum Gumma og eru þeir illa haldnir af golfbakteríu, þannig að á mánudagskvöldið var haldið út á golfvöll og ég dröslaðist með þeim, með hálfum huga þó, því ég alltaf haft lúmskan grun um að golfhæfileikar mínir séu af mjög skornum skammti. Sá grunur minn reyndist réttur, því bara það að komast af fyrsta teig reyndist þrautin þyngri. Loksins þegar ég dreif yfir skurðhelvítið, (eftir að hafa tapað svona fjórum kúlum) endaði kúlan í hnédjúpu grasi fyrir utan braut. Niðurstaðan eftir fyrstu braut var ekki uppörfandi. 10 högg á par 3 holu. Svona gekk þetta hverja holuna á fætur annari, og ég átti fullt í fangi með að halda í við Gumma sem er 11.ára. Ég endaði þó á jákvæðu nótunum með því að para holu nr 9 með ótrúlegri vippu inn á flöt sem endaði 10cm frá pinna þannig að ég gat ekki annað en sett kúluna niður í 3. höggi og náð parinu. Þessi overperfomance á holu 9 verður sennilega til þess að ég neyðist til að fá mér sett.

Vér mótmælum örfáir

2005-08-11T22:39:00.000Z

Þá eru mótmælendurnir farnir í lögreglufylgd til höfuðborgarinnar þar sem skráningarnúmer voru að lokum klippt af bifreið höfuðpaursins íslenska. Ætli það hafi ekki verið neyðarúrræði hjá lögreglunni til að reyna að halda mótmælendum í borginni, fjarri virkjanaframkvæmdum og álversbyggingum. Ekki tókst þeim að stöðva þessar ógurlegu framkvæmdir í þessari atlögu, þrátt fyrir magnaða framgöngu, en þeim gengur kanski bara betur næst. Ég hef grun um að mótmælendunum hafi bara verið orðið kalt og ekki nennt þessu lengur, og ákveðið að fara og mótmæla einhverstaðar þar sem var betri veðurspá, í portúgal til dæmis. Það er nefnilega komið hálfgert haust hérna fyrir austan. Það er alltaf að styttast þetta sumar sem var þó mjög stutt fyrir. Ég verð að færa Arnari Péturs bestu þakkir fyrir að lána mér flakkarann hennar Lindu. Ég hef ekki þurft á leiguna síðan, Ricky Gervais (The Office) er snillingur og ég mæli með uppistandinu hans, Animals og Politics. Ég er búinn að setja flakkara á innkaupalistann, næst á eftir plasmasjónvarpi, því mig verkjar orðið í augun af því að reyna að koma auga á 14" sjónörverpið mitt sem er eins og krækiber í helvíti hérna í stofunni. Ef ekki væri fyrir heimabíó á heimilinu færi allt sjónvarpsefni fyrir ofan garð og neðan. Þetta er ég búinn að þurfa að þola síðan Schneiderinn gaf frá sér torkennilega lykt hérna fyrr í sumar, og neitaði mér um frekari gleðistundir. 14" er náttúrulega ekki boðlegt fyrir enska boltann. Lengi lifi aukinn kaupmáttur!

Internetið fullkomnað

2005-08-11T22:24:00.000Z

Í dag er stór dagur í sögu veraldarvefsins, sem hingað til hefur að stærstum hluta aðeins haft að geyma klám og ósóma, og einungis verið notaður af bólugröfnum, sveittum einstaklingum sem sötra volgt kók og berjast við að halda gleraugunum í föstum skorðum á nefinu á sér. Ég hef loksins látið til leiðast að leggja mitt af mörkum við að gera netið aðgengilegra fyrir þann fjölda fólks sem ekki tilheyrir ofangreinum flokki manna, og hefur eingöngu áhuga á rökhugsuðum vitrænum vangaveltum og uppbyggilegum boðskap sem nýtast kann í hinu daglega lífi. Verði ykkur að góðu.